По повод 10 години од Школата за дизајн и уметност „Џолев и уметностите“, разговараме со нејзиниот основач, Дејан Џолев. Низ разговорот се потсетивме на почетоците, но и на тоа што претставува оваа Школа денес, мисијата и предизвикот да се биде дел од секторот за образование, како и плановите за понатамошен раст и развој. Уживајте!

Џолев, измина една деценија од првиот час во Школата за дизајн и уметност – „Џолев и уметностите“. Може ли да ни раскажете накратко за првиот час? Се сеќавате ли?

Првиот час, како и секој во изминатите десет години, за мене лично е големо задоволство и еднакво важен. Се сеќавам на секој од нив, на секој студент, на секоја домашна задача, на секој проект, на секоја радост и недоразбирање. Привилегија е да си дел од сектор образование, привилегија е тоа што сум ја имал можноста да се дружам, да споделам знаење и искуство, но и да учам истовремено од сите студенти-креативци од различни сфери на дизајнот и уметностите.

На десетгодишнината одлучивте да се ребрендирате од „Џолев и уметностите“ во „Скала – Школа за дизајн, уметност и технологија“. Која е причината?

Поради две терминолошки причини. 

Прво, ние денес не сме само школа за уметност, пред сè, сме школа за дизајн, а од минатата година започнавме и со програми од ИТ-технологиите, па така терминот „уметностите“ е веќе надминат. 

Втората причина е „Џолев“, моето презиме коешто единствено имаше функција во првата година, кога бев единствен ментор. Всушност „Џолев и уметностите“ кога започна како старт-ап во рамки на ПСМ-фондација, практично првата година немаше име, па така на една од паузите во дворот, во спонтан разговор на учениците од различни програми (фотографи, актери, сликари) еден од нив забележа „па ова е Џолев и уметностите“ – се изнасмеавме, но во исто време и ми се допадна ова случајно предлог-решение и во тоа време беше во функција.

Денес школата многу малку е „Џолев“, во исто време е и многу повеќе од „Уметностите“. 

На што најмногу се гордеете изминатата деценија?

Ќе ги издвојам трите најважни работи. И трите работи се поврзани со луѓе 🙂 

Среќни сме затоа што ја сведочиме среќата на студентите. Нивниот професионален развој. Радува фактот што наши студенти денес се активни учесници во креативната индустрија и заедница, а оние кои одлучија да го продолжат образованието, денес се на престижни светски универзитети.

Тимот. И не само активниот тим, туку сите кои имале придонес кон Школата изминатите 10 години. Ние не сме колеги, ние сме семејство! Нашата Школа не е зграда, Школата ни е дом. 

И, се разбира, менторите. Десет години успеавме да го одржиме најголемиот и најквалитетниот дизајнерски и уметнички менторски колегиум. Во моментов се активни повеќе од 50 ментори, универзитетски професори, професионалци од дејностите, најдобрите во индустријата! 

Чест и привилегија е да се дели секојдневието со сите овие прекрасни личности. 

НЕ ПРОПУШТАЈТЕ: Отворени денови под името „Дизајн коктели, технологии и апетисани“ коишто ќе се одржат на 23 и 24 јуни во релаксирачка атмосфера во „Public Room“.

Регистраците се бесплатни и достапни на следниов линк.

Од денешна перспектива, да се биде дел од неформалното образование една цела деценија, вреди ли? Колку е предизвик да се опстои на овој пазар?

Најголемиот предизвик е да се одржи квалитетна наставна програма, на пример од аспект на фонд на часови. За жал, во конкуренцијата постои тенденција на постојано намалување на фондот на часови, со цел да се намали цената на една академска година. Ние упорно и тврдоглаво стоиме на наставниот план во којшто веруваме и секако, се покажува како успешен, токму и затоа нашите академии се најскапи на пазарот. Но, во исто време, ова е предност којашто нѐ издвојува, прави и природна селекција. Амбициозните студенти го препознаваат нашиот квалитет и ја имаме честа да работиме со навистина силни и квалитетни индивидуалци и групи. 

Во изминатите пет години, на овој пазар се појавија голем број на академии и тренинг- центри коишто нудат програми за дизајн и технологии. По што се разликува „Скала“ и какво е вашето мислење за севкупниот пазар и неговите учесници? 

Ние веруваме во практично образование, па така сме единствена Школа за дизајн и уметност којашто им овозможува на студентите современо фото и видео-студио, техничка опрема со 3Д- принтери и таблети за цртање, комплетно опремено модно ателје, работилница за изработка на мебел, цртачко и сликарско ателје и материјали за работа… 

Предност е што во нашата Школа, секојдневно студентите од различните академии за дизајн (визуелни уметности, графички, моден, веб, ентериер-дизајн) се во постојан контакт и комуникација. Многу е важно секој креативец да расте во средина каде што ќе има можност да се запознае со дизајнери од секој аспект на индустријата, затоа што подоцна во „реалниот живот“, ние сме зависни едни од други. Всушност, најголемото богатство е да се биде активен студент, затоа што за време на студирање ги запознаваме нашите идни професионални соработници и партнери, а тоа се колегите и менторите – сето ова од онлајн-настава и од туторијал не се добива. 

Колкаво влијание на пазарот на труд има неформалното образование денес? Дали постои соработка помеѓу вас, компаниите и државните институции (централната и локалната власт)? Колку според вас е значајно да се гради стратегија за економски развој врз база на оваа корелација и соработка?

Неформалното образование реши неколку клучни проблеми на пазарот на труд. Се појавија нови и нови професии, но универзитетите не беа подготвени за брзи промени и воведување на нови насоки на нивните факултети; се отворија нови можности за работа коишто нудат многу поголеми бенефити за луѓето: повисоки плати и хонорари, флексибилно работно време, можности за постојано унапредување на позициите, отворен глобален пазар итн.

Сето ова ја отвори потребата за преквалификација и го забрза процесот на учење каде што се покажа дека за одредени технички професии не се потребни 3-4 годишни студии, особено професии каде што дипломата нема важност. 

Неформалниот сектор на едукација отвори една нова етапа во образованието и во моментов, освен силната релација со пазарот – индустријата, каде што ја следиме секоја промена и потреба од нов кадар, имплементирајќи постојано новитети во своите програми, сме во многу почетна позиција во соработката со државните институции и формалниот сектор на образование. Но сега, со досегашното наше искуство и експертиза, дефинитивно постои простор за дијалог, затоа што може да си помогнеме едни на други, а целта и мотивот секогаш треба да бидат студентите и нивниот развој.

Што е следниот фокус? На каде се движи патот за следната деценија?

Образованието во светски рамки остана последниот сектор којшто најспоро се адаптира и менува на промени. Во тој контекст, но и во контекст на претходното прашање, а сѐ со цел заземање на поголемо учество во креирањето на образовните политики и стратегии, започнавме нов предизвик преку основање на Институтот за дизајн и технологија – ИДТ Скопје. Овој Институт има за цел да ги обедини сите наши досегашни активности и поврзе со сите учесници во образовниот сектор, креативните и ИТ-индустрии. Тоа значи, планираме низа сериозни проекти и иницијативи коишто ќе бидат во насока на подобрување на севкупното формално образование, продолжување на мисијата со „Скала“ којашто покрај едукација има развиено своја дигитална платформа www.skala.mk за промоција на креативните умови и поддршка на севкупната дизајн-сцена.

Не пропуштајте: Во моментов е активен и ПОВИКОТ ЗА СТИПЕНДИИ.
>> повикот е отворен за апликации до 30 јуни!

The post „Џолев и уметностите“ станува „Скала“ appeared first on Skala School.

Разговараме со Христина Пешевска, студент на нашата Академија за ентериер и продукт-дизајн вработена во компанијата Златев инженеринг.

Проект со посебно значење… за мене би го издвоила “Тurquoise minimalism”. Тој проект, всушност е и еден од првите на коишто работев. Дел е од проект за 3д-визуелизација на станбено-деловен објект. Целиот процес од идеја до финален продукт, беше предизвикувачки за мене, почнувајќи од малите димензии на станот коишто бараат користење на светли бои, но истворемено да не биде ни стерилно.

Најзначаен курс во мојата кариера… би го издвоила, курсот за 3ds max. Отсекогаш сум била креативна и сум го користела тоа на многу полиња, но никогаш ништо не ми го задржало вниманието. Кога го посетував тој курс, за првпат вистински почнав да се посветувам на нешто, редовно ги завршував домашните коишто ни ги задаваа и правев и плус од тоа што ни беше зададено. Едноставно ми беше фасцинантно дека се’ што можам да замислам во главата, истото можам да го креирам во 3D баш онака како што сакам, бидејќи рачното цртање не ми е баш јака страна. 

Работната позиција… од мене бара да осмислам идејно решение од зададениот простор (кујна, дневен престој…) и истото да го претставам со 3д-визуелизација, а потоа по одобрениот дизајн мебелот да се подготви и за производство. 

Моите идни планови се… да продолжам да се надградувам во тоа што во моментот го работам, да соберам што е можно повеќе искуство од сите аспекти на оваа индустрија, со цел да можам да го искористам практичниот и креативниот аспект за да започнам свој бизнис.

Омилен дизајнер… немам некој конкретен дизјнер или дело коешто би го издвоила, ги почитувам сите и ги ценам нивните креации, од коишто црпам инспирација за да комбинирам повеќе стилови и затоа се стремам и би сакала моите дизајни да станат препознатливи и да бидат мој идентитет.

Омилен ментор ментор… дефинитивно ми беше Апостол Тноковски.

Омилен предмет… ми беше дизајн-процес којшто го имавме со него.

Омилен час… ми беше последниот практичен час со Илија, кога правевме макети со цевки за водовод.

На оние што  сакаат да се запишат на Академијата за ентериер и продукт дизајн… би им рекла дека е потребна упорност и стремење на нештото да стане реално. Кога веќе имаме цел и визија каков дизајнер би сакале да станеме во иднина, само треба да се ослободиме од правилата и да продолжиме да бидеме свои. И секако да напоменам дека сум многу благодарна на прекрасните ментори на академијата, сметам дека основното нешто коешто треба секој иден студент да го поседува е креативност и голема желба за нови знаења и искуства.

Уписите за новата генерација студенти на Академијата за ентериер и продукт дизајн е во тек! Погледни повеќе на овој линк.

АПЛИЦИРАЈ ЗА СТИПЕНДИЈА!

The post БЛАГОДАРНА СУМ МНОГУ НА ПРЕКРАСНИТЕ МЕНТОРИ НА АКАДЕМИЈАТА ЗА ЕНТЕРИЕР И ПРОДУКТ ДИЗАЈН appeared first on Skala School.

Разговарамe со Бојан Матејин, наш алумни-студент на Aкадемијата за визуелни уметности, вработен во маркетинг-агенцијата „Futura 2/2“.

За себе, би кажал дека сум личност која… сакам да го избегнам моментот каде што се нарекувам неодлучна вага, ама навистина сум, се трудам да сум секогаш позитивен и сакам да помагам на луѓето околу мене. Оптимист сум и верувам дека надежта последна умира – исто така верувам и во карма. Хехе. Не сакам да трошам време на работи  коишто не ме интересираат. 

Пред академијата… работев како фриленс-графички дизајнер и social media creator, менаџер, готвач и бариста во 2 healthy food барови.

По завршување на академијата… ја прифатив понудата за пракса од Футура 2/2, за кратко време и се вработив. Сѐ уште сум таму и ми е навистина мило и драго што сум дел од една од најуспешните маркетинг-агенции во Македонија.

Следно за мене е… сега за сега, се стабилизирав со мојата работна позиција и конечно имам време да се посветам и на некои мои проекти и планови за во иднина. Ќе бидете известени навреме! 😀

Идеално за мојата кариера би било… можеби звучи чудно, но навистина би сакал да се исполни  мојот сон да имам свое креативно студио – паралелно со бистро, во коешто ќе се служи здрава исхрана и добро кафе преку ден и пивце со мезе навечер. Best of both worlds? И јас мислам така.

Омилен ментор на академијата ми беше… клише муабет,  но навистина ми е тешко да изберам еден затоа што сите се уникатни на свој начин и се професори за коишто можам да кажам дека ми е чест и задоволство што сум присуствувал на нивните предавања и одвоиле време да го пренесат нивното знаење на мене и моите колеги. А и не сакам да се налути некој нели…. 🙁 еве 3, златна средина: класната Кристина <3 Дејан Џолев и Зоран Кардула.

Омилен час ми беше… најверојатно часот по фотографија кај Дејан Џолев, кога за задача имав реконтекстуализација на познато дело, јас ја одбрав бананата на Andry Warhol, пионирот на поп-артот (дури истетовирав и банана, кратко после ова збиднување, понесен од целата ситуација) – требаше да фотографирам и бевме во студио со уште неколку колеги (посебен поздрав до Лора и Илијана). Останавме до полноќ, испивме неколку пивца, дружбата и крајниот резултат беа феноменални. Сакам пак!

Омилени трендови во дизајнот ми се… Bauhaus movement, Swiss design / минимализам генерално и постмодернизам. Исто така и кршење на правилата и излегување надвор од некои норми или шаблони. Самоизразување и онака како што се чувствуваме во моментот и како го доживуваме проектот.

Уписите за новата генерација студенти на Академијата за визуелни уметности е во тек! Погледни повеќе на овој линк.

АПЛИЦИРАЈ ЗА СТИПЕНДИЈА!

The post ДРАГО МИ Е ШТО СУМ ДЕЛ ОД ЕДНА ОД НАЈУСПЕШНИТЕ МАРКЕТИНГ-АГЕНЦИИ ВО МАКЕДОНИЈА appeared first on Skala School.

Време е да ги претставиме најозборуваните три дела за месец декември. 

Овој месец го обележа брифингот кој ни пристигна од Младински филмски фестивал, каде што студентите работеа на брендирање на фестивалот што ќе биде одржан во МКЦ од 21 до 24 мај годинава.

Во продолжение погледнете ги делата што беа најбучни во разговорите и анализите за време на часовите, но и надвор од нив.

Бојан Матејин

Бојан е вторпат по ред во рубриката „Најозборувано дело за месецот“, овојпат на предметот „Графичка илустрација“ кај менторот Зоран Кардула, со победничкото креативно решение за брендинг на Младински филмски фестивал 2020. 

Автор: Бојан Матејин
Наслов: Поглед [Официјален постер на МФФ 2020]
Медиум: Постер
Предмет: Дигитална илустрација
Ментор: Зоран Кардула

„Искрено не очекував дека токму мојот постер ќе биде избран за официјален на фестивалот, затоа што имаше навистина супер дизајни од останатите колеги. Се израдував и бев горд сам на себе кога ми ја соопштија веста. Идејата околу постерот беше дадена од самите оргнизатори на фестивалот инспирирани од поговорка на режисерот Херцог. Се решив да ризикувам и покрај деталниот брифинг во кој се инсистираше за жолта позадина и кокошка во анфас.“

Коста Пановски

Прекрасна минималистичка геометриска стилизација, каде што со помош на блок-колоритна валеризација е постигната волуменозна структура помеѓу планинските контури од страна на мултидисциплинарниот студент Коста Пановски, кој го изработи ова дело како работна вежба: Google Doodle за Интернационалниот ден на планината, 11 декември.

Автор: Коста Пановски
Задача: Дизајн на Google Doodle
Тема: 11 декември – Интернационалниот ден на планината
Предмет: Дигитална илустрација
Ментор: Зоран Кардула

„Во моментов сум растоварен од притисок и обожувам да експериментирам, веројатно поради тоа што ми се допаѓаат различни стилови, некогаш комплексни, а некогаш минималистички. Верувам за да изградиш свој препознатлив стил, треба уште многу повеќе работа и испробување на различни правци и техники кои со текот на времето би се склопиле во нешто коешто би било препознатливо како моја лична тенденција.”

Марија Јаќоска

Поетичен фото-есеј кој вклучува интимни детал-фотографии од екстериерот на населбата Водно, сè со цел да се даде еден поинаков поглед и рушење на стереотипот за „луксузната населба“ со „неморални активности и тивки зделки во ноќните часови“? – Ни раскажува Марија која истовремено е студент на Факултетот за ликовни ументости во Скопје.

Автор: Марија Јаќоска
Наслов: Ветов
Задача: Фото-есеј „Моето маало“
Медиум: Фотографија
Предмет: Фотографија и постпродукција на фотографија
Ментор: Дејан Џолев

„При документирањето на „Моето маало“ (нас. Водно) одлучив фокусот да биде на “Старо Водно”, поточно старите куќи и староседелци, нивната топлина и безусловна љубезност и нивниот предизвик да се адаптираат на снемувањето на зеленилото и градењето на хотели и комплекси со станбени згради под и над нивните дворови.”

ДАЛИ ГИ ПОГЛЕДНА: НАЈОЗБОРУВАНИТЕ ЗА МЕСЕЦ НОЕМВРИ!?

КАЖИ ИМ НА ДРУГАРИТЕ И ДРУГАРКИТЕ!
УПИСИТЕ СЕ ВО ТЕК: АКАДЕМИЈА ЗА ГРАФИЧКИ ДИЗАЈН.

АПЛИЦИРАЈ ЗА ЦЕЛОСНА СТИПЕНДИЈА!

The post Топ 3 за месец декември appeared first on Skala School.