Во месец октомври…

Прочитајте за успесите на нашите студенти на интернационални и домашни фестивали, вработувањата во креативните индустрии по завршување на Академиите за дизајн. Прочитајте и за активностите на нашите ментори, но и информации од неформален карактер.

Ти благодариме месец октомври! ♡

НАШИТЕ СТУДЕНТИ…

1. Студентите од Академијата за моден дизајн учествуваа на Fashion Weekend Skopje 2021

Традиционално, секоја година, нашите студенти од Академијата за моден дизајн ги претставија своите модни колекции на Fashion Weekend Skopje, преку краткиот експериментален моден филм „Сепак се врти“. Своите колекции ги прикажаа: Теа Клинчарова, Верица Наковска, Предраг Трајковиќ, Марко Пешов, Андријана Јовановска-Павловски, Николина Ристовска, Сара Павловска и Елена Симјановска.

2. Алумни-студентките Мирјана и Катерина, дел од Fashion Weekend Skopje 2021

Алумни-студентката Мирјана Јосифовска, на FWSK учествуваше со новата колекција на шапки The Seven, а за настанот вели дека е одлична можност и организација за промоција и информирање за одржлива и рециклирана мода и дека смета дека е супер што ова случување било децентрализирано, односно промовирање на модата и надвор од Скопје.

Исто така, дел од FWSK беше и Катерина Димитровска, која ја претстави својата прва независна колекција EUNOIA, од својот бренд Luna Aditeya. 

„Мило ми е што имав шанса да сретнам толку прекрасни луѓе и да го претставам мојот бренд. Оваа колекција се состои од бели мултифункционални кошули, направени од рециклирани и материјали со природно потекло. Тие, со неколку модификации, може да се носат и во професионална и во релаксирана средина. Важниот момент на кошулите се копчињата, кои се направени со 3D печатење и рачна работа со епоксидна смола. Парчињата може да се нарачаат преку директна порака на нашиот Instagram/Facebook.” – ни опиша Катерина.

3. Прогласени најдобрите студенти за академската 2020/21

На голема одговорност и задоволство, ги објавуваме најдобрите студенти за учебната 2020/21 год. на академиите за дизајн. 

АКАДЕМИЈА ЗА ЕНТЕРИЕР И ПРОДУКТ-ДИЗАЈН: 
Христина Пешевска – најдобар студент
Тијана Тошиќ – студент со најголем потенцијал
Јанаки Златев – студент со најголем потенцијал 
Даниела Ајтова Шатановска – студент со најголем развој

АКАДЕМИЈА ЗА ГРАФИЧКИ ДИЗАЈН: 
Стефан Танков – најдобар студент
Андреј Игњатовски – студент со најголем потенцијал
Дино Никочевиќ – студент со најголем потенцијал
Мартин Николоски – студент со најголем развој
Оливер Алексов – студент со најголем развој
Aна Видеска – студент со најголем развој

АКАДЕМИЈА ЗА ВИЗУЕЛНИ УМЕТНОСТИ: 
Андреј Павлов – најдобар студент
Ива Јованова – студент со најголем потенцијал
Марко Вилиќ – студент со најголем развој
Аника Чорбеска – студент со најголем развој

АКАДЕМИЈА ЗА МОДЕН ДИЗАЈН: 
Теа Клинчарова-Стојевска – студент со најголем потенцијал
Андријана Павловски – студент со најголем потенцијал
Сара Павловска – студент со најголем развој
Николина Ристовска – студент со најголем развој

4. „Скала магазин“, со прва галериска изложба

Студентската платформа за дизајн и современа уметност „Скала магазин“, изминатиот месец ја реализираше првата групна галериска изложба во КСП Јадро – Центар. На темата, “Патерн: Визуелни размисли за стереотипите”, се претставија 13 млади автор(к)и, преку различни визуелни медиуми: слики, скулптури, графики, илустрации, фотографии.

5. Фотоедиторијалот на Антонио Станков  за „Herline“

Модниот фотограф Антонио Станков, кој воедно е алумни на Академијата за визуелни уметности, го изработи најновиот моден едиторијал за линијата „Herline” – нов домашен бренд за костими за капење и модерна спортска опрема.

НАШАТА ШКОЛА…

6. Прв учебен ден во нашата школа!

Насмевки, радости, трепети и воздишки ја исполнија нашата школа! На 15 октомври, се одржа првиот учебен ден за новата генерација студенти на академиите за дизајн, кои беа пречекани од класната раководителка Ангела Николовска, која им порача:

Нова генерацијо, ви посакувам среќен почеток, нѐ очекува година полна со нови знаења, предизвици и убави заеднички моменти! 

7. Најголемата студентска изложба за дизајн

Во петте хали на „Јавна соба“, се одржа најголемата студентска изложба за дизајн, насловена како „EGO DISCO“ [латински: Јас учам].

Седумдесетина студенти изложија преку 500 дела, меѓу кои: графички дизајн-решенија, фотографии, илустрации, прототипи, мебел, модни колекции, итн.

Им честитаме на сите студенти и им посакуваме продуктивна кариера, храброст и упорност во креирањето.

Повеќе за изложбата, може да погледнете тука. 

НАШИТЕ МЕНТОРИ…

8. Александар Ношпал, костимограф на премиерата на НОБ

Македонската премиера на една од најстарите балетски претстави „Жизел“, беше збогатена со костимите и сценографијата на Александар Ношпал, ментор при Академијата за моден дизајн. Заокружувајќи со оваа, Ношпал има 72 успешно реализирани проекти во и надвор од Македонија, за познати театарски и балетски претстави како: Лебедово езеро и Оревокршачка, во Операта во Лајпциг; Атмосфери, во Балетот на Рајна во Дизелдорф; Калигула, во Сент Гален, Швајцарија; големиот број балетски претстави во ХНК — Сплит и ХНК — Риека, но дизајнирал и костими за балерините во најпознатиот руски театар „Бољшој“, во Москва. 

9. Доротеј Нешовски, со активна изложба

Менторот по предметот „Цртачки и сликарски техники“ се претстави со истражувачкиот ликовен проект „Сензорни хоризонти“, преку изложбата „Скршени реалности“. Оваа изложба е претставена преку серија на експериментални цртежи во концептуалните простории на личните и психолошки области. Делата може да се погледнат и заклучно со оваа недела, во просториите на КИНФ ОФ ПРИНТ, студио за дизајн и уметност.

10. Постерот на OFFest 2021 – изработка на Зоран Кардула

Јубилејното издание на ОFFest ќе се одржи од 9-13 ноември, а за овогодинешниот постер и целосниот визуелен идентитет на фестивалот се погрижи Зоран Кардула – ментор на академиите за графички дизајн и визуелни уметности по предметот „дигитална илустрација – ADOBE Illustrator“. 

Се читаме следен месец! ♡

The post РEТРОСПЕКТОР // ОКТОМВРИ: Стапнавме во школата, денес „газиме” во креативните индустрии appeared first on Skala School.

„Најдобар фотоапарат е оној што го имаме со нас!“ -вели Драги Неделчевски, и во право е, но најчесто тоа се нашите смарт-телефони, коишто ни овозможија секој од нас да е фотограф! Фотографијата никогаш не била толку жива, истовремено фотографијата никогаш не била толку мртва! Најголемиот проблем на фотографиите кои ги правиме со нашите смарт- телефони, воопшто и не ги гледаме… „Колку помалку имаш, толку си покреативен“, е максимата на Вим Вендерс, но верувам и повеќето креативци не само што ќе се сложат со истото, туку некогаш и го кажале истото. Колку помалку техника/опрема поседуваме, толку сме повнимателни во процесот на создавање и поселективни во чинот на претставување.

Академијата за визуелни уметности е богата со мултидисциплинарни студенти. Од непроценливо значење е да созреваш и да се дружиш со таква група. Изминатиот месец ќе го посветиме на студентите чијшто прв медиум е фотографијата (и филмот). На дилемата Дали фотографијата е мртва или е во транзиција на преродување, нека одговорат токму нашите студенти?!

КОСТА ПАНОВСКИ

Објективот на Коста е многу храбар и дрзок. Не секој објектив (фотограф), е подготвен да се соочи во дуел со непознат протагонист на улица. На неговите градски документарни есеи и ситуации, секогаш во фокус е нечие лице, во точна, искрена експресија, емоција. Коста е „невидлив“ фотограф на улиците, како луѓето да не го забележуваат неговото дејствување или пак, Коста е премногу внимателен и умешен во пристапот и успева да го препознае и фотографира вистинскиот момент во прекрасни ликовни композиции. Јас, како набљудувач на неговите фотографии, имам чувство дека Коста не е свесен за големината на неговите фотографии и неговиот фотографски капацитет. Објективот на Коста не е само храбар и дрзок, тој е повеќе од интелигентен и искрен.

Автор: Коста Пановски
Инстаграм: ko___pan
Наслов [ред I]: 1/Aleks, 2/Movement, 3/LadyinRed, 4/Looks;
Наслов [ред II]: 5/Reflection, 6/Can’tSeeCan’tTalk, 7/Joy, 8/Shape&Reflection.
Медиум: Фотографија
Академија: Визуелни уметности

КОСТА: Фотографијата како медиум, во целост ми е омилен начин на изразување, особено уживам во документарната и уличната фотографија. Лица, емоции, експресии од луѓе, улица, мириси… Сите ние, какви што се познаваме, а може и не. Веќе некое време, работам како графички дизајнер во студио. На Академијата за визуелни уметности, открив многу нови методи на работа, подобар пристап и начин на решавање на проблемите во текот на работата. Како важен момент во мојот случај, можам да го издвојам динамичниот начин на учење, работа, размена на идеи и знаења со колегите и менторите. 

АНТОНИО СТАНКОВ

За разлика од „вистинитоста“ на Коста, Антонио е фотограф кој има за цел да го пронајде поубавото во убавото. Себе се претставува како моден и портрет-фотограф, но јас, како негов ментор, ќе додадам дека е експерт и за постпродукција и монтажа на фотографија, задолжителна вештина за секој фотограф, без разлика на дисциплината во којашто создава. Антонио е хиперпродуктивен фотограф, неуморен во физички и креативен контекст. Во оваа рубрика, издвојувам две негови фотографии коишто беа објавени на две насловни страни на „Скала магазин“ за месец јуни. 

Автор: Антонио Станков
Инстаграм: stankovantonio
Фотографија I: Елена Гугоска / DRAWSPECTIVE / Skala Magazine no.I
Фотографија II: Мартина Пенева / APORIA / Skala Magazine no.III
Медиум: Фотографија
Академија: Визуелни уметности

AНТОНИО: Фотографиите се наменски портрети, визуелни решенија за потребите на насловната страна на „Скала магазин“. Работени со вистински ентузијазам, чијшто квалитет/вредност/или некој друг синоним, треба постепено (скала по скала) да расте и да се подобрува. На овој проект сум посебно горд и го работам со задоволство, особено што е соработка помеѓу нас, студентите од Академијата за визуелни уметности, спој на нашата креативност и техника.

ДИМЕ ДАНОВ

Диме е визуелен поет. Неговите фотографии се поезија. Оваа фотографија е една од најобичните фотографии, но истовремено и една од највпечатливите. Истовремено нема ништо, но и преполна со сè што треба да има. Празна и полна. Нема што да гледаш во неа, а може да ја гледаш со часови. Тоа е големо мајсторство, претпоставувам Диме создава од чиста импресија, без конретна намера да нè хипнотизира како набљудувачи. Тој создава инстинктивно, како резултат на неговото љубопитното истражување, трпеливо и тивко набљудување, искрено и ненаметно опсервирање на просторот, светлината, бојата, текстурата… Диме Данов е поет.

Автор: Диме Данов
Инстаграм: dimedanov
Наслов: Само за вили и вилењаци 
Медиум: Фотографија
Академија: Визуелни уметности

ДИМЕ: Фотографијата е создадена во Копришница, во близина на црква. Тука, сè гали околу нас,  мирисот на мајчина душа и диво оригано. Во црквата, баба Вера нуди благослов. И потоа паѓа самрак, долга експозиција, помошно светло и штрак…! 

САРА САРАЛИЕВА

Во ова месечно издание, за првпат имаме гостување.  Сара е студентка на Академијата за графички дизајн. Таа е илустратор. Барем во оваа нејзина рана фаза од нејзиното творештво, таа пред да започне со студии на академијата, дизајнот ѝ бил само желба, а денес таа вели: „Зошто не се запишав порано?!”. Неуморно илустрира на секаков тип подлоги, површини, квадратури, материјали: хартија, чаши, маици… и на облаци!

Автор: Сара Саралиева
Инстаграм: sara.daily.illustrations
Наслов: 1/Clouds as inspiration, 2/ha! ha! ha!, 3/Weird clouds.
Медиум: Фотографија + илустрација
Академија: Графички дизајн

САРА: Секој од нас, барем еднаш застанал за миг да ги погледне облаците и да препознае фигура на некое животно, предмет или сосем нешто друго имагинативно. Барем јас го правам тоа секогаш кога има облаци, зашто ми го дава она топло чувство на детство. Целиот процес е многу едноставен и би можел да го направи секој. Почнува со еден облачен ден, фотографирајќи ги облаците (обично со мобилен телефон, затоа што секогаш ми е при рака) и завршува на Adobe Illustrator, исцртувајќи линии според формите што во тој момент ги гледам. 

На Академијата секогаш насмеаните колеги и колешки, и секако прекрасните ментори, во најпозитивна
смисла ми го сменија погледот на животот, и мене како личност. Тоа е искуство само по себе. Замисли
да го работиш тоа што од секогаш искрено и најмногу си го посакувал/а!? Јас замислував и еве сега ми се
остварува!

ПОГЛЕДНИ ГИ ТОП 3 ЗА МЕСЕЦ МАЈ

The post Топ 3 за месец јуни appeared first on Skala School.