На пауза ѝ отидовме на работа, каде нѐ пречека нејзиниот симпатичен миленик, кученцето Фројд. Ни раскажа како ѝ поминува еден работен ден во маркетинг агенцијата DO:MORE, за клиентите и потребите со кои се соочува, но и адреналинот кој ја прави нејзината работа динамична.

Зборуваме со Мартина Митревска, алумни студентка на Академијата за графички дизајн.

DO:MORE е маркетинг агенција од Скопје која постои неколку години и се води по мотото дека „секогаш може повеќе“ особено кога станува збор за поврзување на клиентите и брендовите.

Работното искуство во DO:MORE би го опишала како…

Огромен предизвик секојдневно да работам на различни проекти.

Секојдневно соработувам со различни клиенти, различни креативни умови и барања.  Во тимот сум повеќе од една година и слободно ќе кажам дека ова е работна средина во која го унапредив своето познавање за работата, во однос на изнаоѓање креативни решенија за одреден графички проблем.

Сите идеи што треба да станат решение, надминувањето на секоја препрека до усовршување на секое скалило до дигитален материјал… Сѐ до социјални медиуми и изработка на принт материјали.

Како тече еден работен ден во агенција?

Денот ни започнува со тимски состанок, на кој разговараме што сѐ треба да се сработи во текот на денот. Разгледуваме проекти кои ни се на листата to do (more) 😊

Потоа уживаме во динамиката на денот, стигнување на рокови, егзекуција. Често имаме состаноци со нови или постојани клиенти, истражување на маркетинг трендовите на пазарот. Крајот на работниот ден е секогаш резервиран за сумирање на резултатите од сработеното и оценување на продуктивноста.

Како ти помогна Академијата за она што го работиш и создаваш денес?

Откако знам за себе, ја сакам уметноста. Академијата за графички дизајн ми помогна уште повеќе да ја засакам уметноста на начин што станав свесна за себе и своите уметнички погледи. Најголема придобивка од Академијата е што конечно успеав да излезам од сопственото „заложништво“ (комфор зоната).

Сега создавам свои уметнички ќошиња, ја „уживам“ целата привилегија на самата Академија, можноста да соработувам со креативни индустрии, да го живеам процесот од идеја до реализација и најмногу од сѐ – шансата да работам и творам на реални проекти.

Какви се предизвиците додека работиш, со какви клиенти соработуваш?

Најголем предизвик на работа ми е секојдневното пронаоѓање на решенија за различни креативни проблеми, во најкус временски период. Таа динамика од трансформација на моите креативни мисли од еден на друг проект со комплетно различен правец и динамика… Тој момент на работа под позитивен притисок и рокови. Токму таму го пронаоѓам најголемиот адреналин во моето креативно творење.

Соработката со клиентите ми е инспиративна, бидејќи за голем дел од нив работиме целосни графики за нивните потреби: од постери, банери, флаери. Сѐ од дигитален и печатен принт. Дел од нив се од архитектонската, модната, но и угостителска индустрија, значи широк лак на клиенти.  

На кои проекти или соработка со клиенти си најгорда?

Имам многу проекти на кои сум горда што сум била дел од тимот што ги создавал. Ако треба да одберам само еден, тоа е дефитинитивно создавањето на еден нов бренд на пазарот, првата македонска козметика за кучиња, BooBoo. Целиот процес би го опишала како една активна и комплексна забава, затоа што за првпат на пазарот нудиш козметика за миленици.

Тој проект беше многу важен за мене, и тимот со којшто ја создававме приказната. Со BooBoo се здобив со голема креативна самодоверба и поттик да продолжам да го давам најдоброто од себе.

Честитки Мартина!

Разговараше: Ана Голејшка Џикова
Фотографија: Ана В’чкова

The post Ја „уживам“ целата привилегија на Академијата за графички дизајн – На пауза со Mартина од „DO:MORE“ appeared first on Skala School.

Секогаш сме среќни кога нашите алумни студенти ја пронаоѓаат работата која ги исполнува. Во овој случај, се работи за наша алумни студентка, Теа Клинчарова, која ни раскажа какво ѝ е искуството додека е на работа во модна компанија од Њујорк, Stylitics.

Низ разговорот со Теа, сфативме дека таа всушност направила огромна промена на својата кариерна ориентација, а првиот чекор бил: упис на Академијата за моден дизајн.

Ја прашавме што точно претставува нејзината работа и како тече еден работен ден.

Работам во Stylitics, компанија од Њујорк која нуди визуелни решенија за продажба на модни парчиња, козметика и ентериер.

Чуството да сум дел од оваа компанија која пред сѐ е иновација во онлајн стилизирањето, е доста возбудливо и пресреќна сум дека во Македонија јас и моите колеги добивме шанса да работиме нешто што претходно не било достапно. Работното време е по „американски“ стандард, што значи почнуваме со работа во 12 часот пладне, а завршуваме во 19 часот.

Stylitics е компанија која е стационирана во Њујорк, која е примарно платформа за визуелни решенија и продажба на облека, козметика, ентериер. Во истата работат модни стилисти, визажисти и уметници од глобалната мрежа.

За работните обврски ни кажа…

Секој ден е нова приказна и секој ден е многу интересно бидејќи главната преокупација ми е комбинирањето на различни парчиња од познати брендови и сето тоа да се обликува и предложи на страницата за да биде примамливо, но и да има стилска вредност. За мене тоа е најинтересниот дел од работата.

Работам од дома, иако ние како тим гледаме да се дружиме и да работиме понекогаш заедно во заеднички co-work местенца кои ги има сѐ почесто во Скопје. Работиме за брендови кои ни се дадени од страна на нашата менаџерка Сара Стојчевска, која е најзаслужна за тоа што ние од Скопје можеме да работиме за нив, пример со најголемата стоковна куќа во Америка, Macy’s, на која има многу светски познати брендови, од Michael Kors, Gucci, DKNY до Calvin Klein.

Исто така имаме цели кои треба да ги исполниме во текот на денот и потоа добиваме фидбек од страна на клиентот за сработеното.

За искуството на Академијата во Скала ни сподели…

Академијата за моден дизајн и предметите кои ги поминав во таа година, за мене беа од големо значење, се здобив со големо знаење и само ми е жал што Академијата не траеше повеќе од една година. Уште ги паметам и зборовите на менторот Буле: „На почетокот едвај конец во игла вденуваше, а види се сега до каде стигна!“

Реално, јас сум јазичар по професија (имам дипломирано италијански јазик и книжевност) и работев во сосема друг сектор пред да се одлучам дека сакам да одам на Академијата и да излезам од сопствената комфор зона.

За преквалификацијата…

Тоа што јас го имав како желба и животна пасија, со помош на менторите го надградив, иако сметам дека со текот на работата сѐ уште учам и ќе учам. Навистина сум среќна дека успеав со помош на Академијата да направам преквалификација и да го работам тоа што од секогаш сум го посакувала!  

Честитки Теодора!

Разговараше: Ана Голејшка Џикова
Фотографија: Ана В’чкова

The post Работам на комбинирање на различни парчиња облека, од Gucci до Calvin Klein – На пауза со Теа Клинчарова од „Stylitics“ appeared first on Skala School.