Оваа година ќе бидат претставени повеќе од 400 дизајн решенија, концепти и уметнички артефакти во пет концепирани хали. Осврт за изложбата даде оперативниот директор на школата, Бинаса Дрндар: 

„Станува збор за најзначајната и најмасовната дизајн ноќ во годината. Таа вечер во публиката покрај нашите пријатели и соработници, ќе бидат и најзначајните компании од креативните индустрии во потрага по своите идни колеги, што е практика изминатите неколку години.“ 

Студентите ќе се претстават во неколку категории и медиуми: фотографија, филм, графички дизајн, моден дизајн, индустриски и продукт дизајн. [линк до настанот]

СТУДЕНТИТЕ НА ПРАКСА

Изложбата е последниот чекор пред студентите да заминат на работна платена пракса во најзначајните компании од креативните индустрии.

Имено, неодамна се одржа настан на кој студентите од академските програми, јавно ги презентираа своите портфолија. На овој настан од особено значење беше поврзувањето на студентите со наши реномирани компании кои го поздравија овој настан и им дадоа можност на студентите да посетуваат пракса во: New Moment, Koma – design studio, McCann Skopje, Publicis, Seavus, Pointer, Novatone Group, Cosmic Development, CodeWell, Friday Communications, Vinset Grafika, Heppiness marketing, Bella, Okitex и модната куќа Waescheflott од Виена, Австрија.  

Како што нѐ информираше наставниот координатор на школата Кристина Крагујевска, 

„Настанот е дел од предметите „Развој на лична кариера“ и „Бренд Менаџмент“ кои се единствени предмети од ваков тип во неформалното образование со цел да им помогне на студентите во нивниот понатамошен професионален развој и трајно вработување“.

ГЕНЕРАЦИЈА 2020/21

Уписите за новата генерација 2020/21 се во завршна фаза. Од Џолев и уметностите истакнуваат дека оваа учебна година се овозможени 80 слободни места и тоа на Академијата за визуелни уметности, Академијата за ентериер и дизајн на мебел, Академијата за графички дизајн и Академијата за моден дизајн. 

Учебната година започнува на 16 октомври, под исклучително високи стандарди и мерки пропишани од Министерството за здраство, каде дополнително секој студент може да избере дали програмата ќе ја следи со физичко присуство или комбиниран начин – теоретскиот дел онлајн, додека практичниот со физичко присуство. 

ПАРАДИГМА // 16 ОКТ. / 19:00Ч. // ЈАВНА СОБА

УЧЕСНИЦИ: Наталија Ристова, Магдалена Аврамовска, Ана Рунчева, Милан Димитриев, Марија Кошевец, Сара Саралиева, Владо Србиноски, Долорес Соколова, Магдалена Филипова, Ивана Пекевска, Ангела Митреска, Благој Младеновски, Илијана Такашманова, Коста Пановски, Никола Панов, Марија Јаќовска, Марио Манески, Сара Кирјас, Бојан Матејин, Симона Руменовска, Диме Данов, Александра Донева, Антонио Станков, Александар Вучковски, Елена Стојковска, Магдалена Донеска, Александра Таушанов, Ева Таневска, Христина Младенова, Ана Франгова, Никола Јовановски, Катерина Димитровска, Медина Усеин, Марија Цвеевска, Кристијан Тргачевски, Ангела Настевска, Ена Стојанова, Душко Сековски, Роберт Вучковски, Кристина Ристовска, Горазд Атанасоски, Кристина Стојчевска, Анастасија Андова, Мимица Кузманова, Милена Митровска, Јордан Ѓорески, Никола Тодоровски, Христина Пешевска, Дарко Цапан, Маја Анчевска Цветковска, Пецо Данајловски, Александра Јаќоска, Славица Цабеска, Мартина Салова Чешновар, Драгана Трајкова, Toме Aрсов, Теодора Ангелевска, Марко Тодоровски, Александра Маџоска, Андреа Маркоска, Александра Јаќоска, Алпај Мемедовски, Иван Каратанов, Петар Иванов, Маја Анчевска, Матеј Совкаровски, Калина Сејфула, Фрањо Доминик Матиќ. 

_____
Дизајн на постер: Коста Пановски
Фотографија: Филип Бојковски

The post 78 АВТОРИ ИЗЛОЖУВААТ НА „ПАРАДИГМА“ appeared first on Skala School.

ИЗДВОЈУВАМЕ ИМПРЕСИИ ОД ПОСЛЕДНИОТ ПРОЕКТ НА МОИТЕ КОЛЕГИ ОД АКАДЕМИЈАТА ЗА ПРОДУКТ ДИЗАЈН.

Дизајнот како процес не е само да се направат работите да изгледаат привлечни, употребливи или пак дури и да се создадат само за задоволство, станува збор за транзиција на производи од употребливи до значајни и сѐ почесто пораката која се испраќа преку дизајнот е многу побитна од самиот производ.

Овој месец тема на разговор со Ангела Настевска ни беше токму дизајнот со порака. Целта на дискутираниот проект „Контејнерот за ѓубриња” е да ја подигне свеста кај луѓето за почиста околина.

Приказната позади дизајнот

Ангела Настевска:

Првичната идеја беше редизајн на контејнерите за ова поднебје со цел подигање на свеста кај луѓето против фрлањето на отпадоци насекаде, а пред сѐ на места каде што не смеат да бидат фрлени. Главната цел беше на корисникот, фрлачот на ѓубре, да му се пренесе порака дека местото на ѓубрето е во контејнерите, а не по страните, на земја или пак по тревниците. Сметам дека недостигот на култура на живеење е причината заради која овој проблем кај нас е толку распространет. Пример, за многу луѓе е навика, па и номално отпушоците да се фрлаат насекаде. Во последните години имаше и повеќе акции за чистење на јавните простори меѓутоа сепак мислам дека пораката „НЕ ФРЛАЈ!!!“ не е доволно распространета за да премине во навика.

Имав различни концепти за контејнерот, но на крај сепак беше избран концептот кој не ни содржи вистински контејнер. Мојот контејнер е невидлив. За него е одвоен простор (правоаголник) на земја обележан со жолта линија со димензии слични како оние на обичен контејнер, бидејќи веќе е нормално да се фрла на земја, со „дводимензионалниот контејнер“ ова на некој начин се формализира. Секако пораката е иронична и има две можни завршни сценарија – пораката ќе биде пораспространета во јавниот простор (дека на ѓубрето не му е местото на земја) и полека ќе премине во навика, или пак луѓето навистина ќе фрлаат со што иронијата ќе биде уште поголема.

За овој проект најзначајни спецификации беа формата, преку која пораката треба визуелно и метафорично да ја пренесе на корисниците и секако локацијата. Замислата е да биде поставен на јавни места каде што досега не сме гледале купови ѓубре, како на пример на Плоштад, пред Влада или пак на некои од пофреквентните тротоари во градот.

Втората верзија е наменета како додадок на класичните контејнери во градот. Со ова конечно отпадоците оставени до празните контејнери ќе бидат на своето место. 🙂

П.С. Ќесата со шишиња од Слика 4 не е додадена во постпродукција, туку првично беше до празниот контејнер.

Како машински инжинер, а невешта во создавањето на дизајн ми требаше доста време и итерации за да дојдам до најдобрата форма која најдобро ја пренесува мојата порака. За ова, голема заслуга има менторот од Академијата за Продукт дизајн, Никола Узуновски, кој ме научи повеќе за визуелната комуникација.

Верувам дека секоја промена почнува од нас. Често, вината за многу проблеми ја бараме во другите. Сите како што имаме права, така имаме и одредени обврски. Според мене, моја должност е и јас да се грижам за мојата околина. Не можам да разберам како отпадокот се фрла на земја кога во близина има корпа. Не е работа на ѓубреџиите да го собираат во тревниците туку да ги испразнат кантите, додека моја работа е тој отпадок да го ставам на вистинското место. Ова правило е многу едноставно и сите го знаат, меѓутоа сепак нормално е да се прекрши. Дури е и чудно доколку се почитува. Затоа сметам дека за решавање на овој проблем е потребна  опомена на луѓето, односно нешто што ќе ги засрами. Мојот дизајн го „нагласува“ овој проблем со надеж дека ќе биде потсетник и гласно ќе вика „НЕ ФРЛАЈ! :)“.

The post ПРОШЕТКА НИЗ ДИЗАЈН-ПРОЦЕСОТ: КОНТЕЈНЕР ЗА ЃУБРИЊА appeared first on Skala School.

МОДЕН ДНЕВНИК #2

на Ева Поп Таневска

Опсервирај, учи, создавај, покажи.
Сакаш да запознаваш и осознаваш, да истражуваш и фантазираш? Да го откриеш непознатото и достигнеш невозможното… Со само една замисла и идеја, ти бестрашно се впушташ во креирање на секојдневието. Секојдневие каде што МОДАТА го движи, менува и обликува светот на постоечкото, но и новото и непознатото!

Се чувствувам одлично што имам шанса да зборувам и пишувам за уште едно ново создавање и креирање на моите колеги и студентите на Академијата за моден дизајн. Би сакала да ве воведам во уште еден процес. Вториот студент којшто мене ме инспирираше е Никола Ј. Тој со овој  проект сака да прикаже како од култ на млади доаѓа до целосна промена на модата.

Повторно се работи за задача којашто навидум е едноставна, но воопшто не е така. Една од најтешките задачи е да се искажеш и да допреш до некого преку она што ти го учиш и работиш, а за некого тоа е непозната сфера. Никола својата инспирација ја пронаоѓа во шеесетите години на минатиот век, времето во кое тој би сакал да живее и твори. Времето на занишаните шеесети кои биле младинско движење потенцирајќи го новото и модерното. Тоа било период на оптимизам, хедонизам и културна револуција и Лондон како глобален центар на младешката креатива и возбуда во една деценија каде доминираат младите. Тој вели дека овој период за него е посебен поради културната револуција управувана од младите нагласувајќи ја модерноста и процветот во уметноста, музиката и модата. Како клучен елемент биле модернистите како водачи на Британската инвазија. Тие усвоиле многу трендови што ќе ги имитираат многу млади луѓе, создавајќи свој начин на живот. Рок бендовите како “The Who” “The Beatles” “The Kinks” сите произлегле од субкултурата на МОD.

При самото создавање на овој проект Никола открил многу нови работи за себе си кој што не ги познавал и немал шанса се до сега, а тоа е носталгија за работи кои веројатно никогаш не ги знаел. Луѓе опседнати со мода и хедонистички култ на хипер-кул млади кои живеат во Лондон. Неговите музички херои се David Bowie, Mick Jagger, Keith Richards, George Harrison кон нив чувствува поврзаност со нивната привлечност, естетика и стил. Кај нив постои идеја за андрогинија која е поврзана со неговата силуета, дизајн естетика и недостаток на родова дефиниција. Суштината на нивната работа, исто така нивните кодови и елементи се дел од неговиот јазик. Покрај сето ова психичко и емоционално поврзување кон процесот на создавање доаѓаме и до делот како изгледа тоа создавање кај Никола. Како и сѐ останато ова е долг процес на усогласување, уредување на идеи и барање на тоа чувство без напор, органско чувство и нештата да се чувствуваат автентични. Прашањето за „добар вкус“ наспроти навестувањето на „вулгарност“. Никола вели дека никогаш не се чувствува пријатно со фригидната идеја за „добар вкус“, малку поразлично и неконвенционално е она што го сака и разбира. Неговата мисла зад оваа колекција е дека секогаш во животот има нешто што не сме го откриле и постигнале. Никогаш не ја завршуваме трката, тоа е тековен експеримент. Она што него го мотивира е откривањето на нова музика, неискористени таленти, возбудата на младоста и дека мора да гледаме кон иднината, но тоа не значи дека треба да го заборавиме минатото.

Пораката зад оваа колекција на Никола е:

„Убавината на светот, каде што живееме денес е дека модата може да биде личен начин на изразување, да му кажеш на светот: „Погледни ме и јас имам нешто да кажам!“. Јас сум заинтересиран за слики и пораки кои се втемелени во културен контекст, но во исто време треба да бидат изведени на убав начин. Модата е платформа преку којашто го правам тоа на сексуално двосмислен, радикално различен изглед за луѓе со пристап на различен начин.”

The post МОДЕН ДНЕВНИК / НИКОЛА ЈОВАНОВСКИ appeared first on Skala School.

Од студентите за студентите:

ИЗДВОЈУВАМЕ ИМПРЕСИИ ОД ПОСЛЕДНИОТ ПРОЕКТ НА МОИТЕ КОЛЕГИ ОД АКАДЕМИЈАТА ЗА ГРАФИЧКИ ДИЗАЈН, ПО ПРЕДМЕТОТ ПОСТПРОДУКЦИЈА И МОНТАЖА НА ФОТОГРАФИЈА, ПОД МЕНТОРСТВО НА ДЕЈАН ЏОЛЕВ. 

Задачата беше брифирана под тема „Рекреација или реконтекстуализација на култно сликарско дело“, со цел совладување на принципите во монтажа на фотографија, но и одлична можност за доусовршување на нашите знаења во дигиталната алатка ADOBE Photoshop. Разликата помеѓу „рекреација“ или „реконтекстуализација“ е во тоа, дали ќе го рекреираме во целост познатото сликарско дело, или преку „реконтекстуализација“ ќе интервенираме со контекст во делото.

Првиот чекор на проектот беше одлука кое култно дело да го одбереме за да го рекреираме/реконтекстуализираме. Поминавме 48 часа (викендашки) во потрага по инспирација, преку гуглање и стручна литература. Додека го правевме изборот, немавме идеја како ќе ја реализираме, но со практични, методолошки совети од страна на нашиот ментор, почнавме да ја развиваме идејата секој индивидуално за сопствениот избор. Процесот се состоеше од барање модел, избор на локација, костими, шминка, реквизити, светло, итн.
Интересен е фактот што повеќето од нас се одлучија за изработка на автопортрет, преку интервенција (реконтекстуализација) на портретна слика од некој голем мајстор.

Мартина Салова Чешновар, одличнa фотографка, прва закажа фотосет во студио. Таа го одбра Рене Магрит и интервенција на делото „The Son Of Man”.

Ова беше првиот фотосет што се одржа во студио и претставуваше одлично искуство за мене и моите колеги. Бев љубопитна за изборот на Мартина, па ја прашав зошто го одбра токму ова дело на Рене Магрит:

„Зашто е истовремено уметник и филозоф, зашто го тера набљудувачот да размислува, зашто ми се допаѓа тоа што е мрачен и бизарен. Има широк опус, а делата му се многу интересни и отворени за разни интерпретации“.  Мартина ни го сподели и искуството околу предпродукциските подготовки: „Секогаш сум многу возбудена кога сум на фотосет. Кога фотографирам, толку се внесувам во работата што заборавам на сите ситни несигурности, на сѐ околу мене и се фокусирам само на тоа што го правам. Дури не бев свесна ни колку ми беше топло така наоблечена, додека не заврши сетот. Што се однесува до костимот и реквизитите – штом се одлучив за делото, веднаш почнав да размислувам за тоа. -Аха, добро, палто ќе позајмам од брат ми, кошула имам, шеширче ќе купам, вратоврска ќе ми даде другар“… 

А на крајот поразговаравме и за интервенцијата на делото од Магрит:

„Најголемата интервенција е тоа што наместо маж, на фотографијата стои жена. Друга интервенција е реквизитот. Магрит имал обичај ликовите на луѓето што ги слика да ги крие со некои вообичаени објекти од неговото опкружување и на тој начин да поттикне некаква мистериозност, но и непријатност. Во ова дело, лицето на човекот е затскриено од зелено јаболко. Субјектот е човек-бизнисмен што го губи својот идентитет, облечен во облека карактеристична за тоа време и место, толку фокусиран на она што му е пред очи, што не ја перципира околината. Во моето дело, лицето ќе биде затскриено од телефон. Има смисла, нели?“ – ни сподели Мартина.

Би сакала да го издвојам и проектот на Томе Арсов. Томе е препознатлив по својот хумор на часовите и секогаш е спремен да даде идеја плус за реализација.
Според мене, Томе имаше голем предизвик за реализација на делото. Во случајов, го одбра за рекреација делото на Рене Магрит – The Present.

„Нешто морав да одберам нели?! Најпрвин сакав да биде нешто поразлично од останатите примери, па одбрав сосема случајно, а дури потоа констатирав дека ми е баш супер избор“. – Томе ни раскажа и за потрагата по моделот : )

„Хахаха… лудо… Идејата беше на менторот секој од нас да напише „оглас“ статус на Фејсбук дека бараме орел. Нормално, имаше шеговити коментари, но имаше и баш такви какви што баравме“.

__________

__________

__________

__________

На крајот Томе имаше толку многу избор што можеше да одбере вид и големина на птица. Се одлучи за јастребот Хари којшто дојде во нашето студио заедно со Трајче Китановски, неговиот сопственик.

„Во еден момент, додека го фотографирав Хари, гласно го молев да ја сврти главата на другата страна, како што ми беше потребен со зборовите: сврти се Хари, сврти се… а тој во тој момент се сврте, но не само главата туку целиот, практично ми сврте грб и сите присутни едногласно „паднавме” од смеа“. – ни додаде Томе од искуството на сетот.

Овој проект беше одличен и продуктивен предизвик за мене и моите колеги. Постојано бевме во заеднички контакт, си помагавме на фотографските сетови, споделувавме идеи и реквизити, се радувам што сме добар тим!

За крај, споделувам и неколку импресии од анализа на делата. Нашиот ментор нè изненади со „мини“ изложба, каде што беа отпечатени и изложени нашите фотографии. По жестоката анализа од страна на менторот, наздравивме со шампањ, а веднаш по паузата бевме брифирани за нашиот следен проект „концепт-фотографија за постер-кампања на општествено одговорна тематика“. 

Сите останати конечни дела ќе имате можност да ги погледнете на нашата завршна изложба на есен, а за крај на приказната, ќе ви спомнам и за мојот проект. Решив да се посветам на рекреација на делото на Енди Ворхол „таткото на поп-артот” и неговото дело Liz. Причината поради којашто го одбрав ова дело е баш филмската дива Елизабет Тејлор… Толку од мене, се читаме во наредна прилика, со нешто ново и интересно.

______
Фотографии од час: Томе Арсов

______________

УПИСИТЕ ЗА НОВАТА ГЕНЕРАЦИЈА СЕ ВО ТЕК!
ПОГЛЕДНИ ПОВЕЌЕ:
АКАДЕМИЈА ЗА ГРАФИЧКИ ДИЗАЈН

The post ДИЗАЈН ПРОЦЕС: РЕКРЕАЦИЈА – РЕКОНТЕКСТУАЛИЗАЦИЈА appeared first on Skala School.

Продукт-дизајнерите се решавачи на проблеми. Креативноста ни произлегува од ситуациите за коишто останатите тврдат дека немаат решение, а ние тврдоглаво не прифаќаме НЕ за одговор. На Академијата за продукт-дизајн во Школата за дизајн и уметност Џолев и уметностите, си поразговарав со Ена Стојанова, којашто ни раскажа за нејзиното решение за студентско домување. Проблемот што ја мотивирал Ена да размислува на оваа тема е губењето на приватноста на студентите по вселување во студентскитеш домови.

Ена: „Идејата за почеток на овој проект беше отворање на повеќе опции за сместување на млади и студенти. Ваков тип на сместување алудира на простор со мали димензии, па според тоа сметав дека за таа цел соодветна би била пренамена на контејнери за транспорт на стока. Проекти од овој тип веќе постојат, а ова е една моја варијанта.”

Со пренаменувањето на овие контејнери се постигнуваат повеќе позитивни резултати, како: 

• Простор којшто има поголема приватност од стандардните начини за домување на студенти (студентските домови);
• Начин на рециклирање на контејнерите коишто остануваат како отпад;
• Побрз начин на обезбедување на домови, во однос на стандардниот начин на градење;
• Можности за организација на пренаменетите контејнери на повеќе начини: на асфалтирани површини, во природа, наредени едни врз други (во вид на зграда), итн.;
• Економски одржлив процес – доколку се изведе правилно;
• Можен транспорт на контејрот – доколку некогаш тоа е потребно;

„За да се започне процесот на дизајнирање, потребно е прво да се направи подетално истражување на темата, во случајов домување во контејнери за транспорт на стока. Се запознавам со позитивните и негативните страни на ваквото домување, материјалите коишто најчесто се користат во други проекти од овој тип итн.”

Следниот чекор е проектирање на просторот. Целта ми беше да ги вклопам сите основни елементи за комотно живеење на еден млад човек (сопствен тоалет, кујна, машина за алишта, работна површина, дел за дружење, итн.). Поради тоа, експериментирав со повеќе димензии на контејнери, различни варијанти на мебел, различни поделби на просторот, итн., сè додека не добив нешто со коешто бев задоволна. Процесот на проектирање го изведувам во AutoCAD, а понекогаш користам и брзи скици што ги правам или на рака или во SketchBook

Работи што ги имав предвид при проектирање на контејнерот:
Стандардните контејнери за транспорт на стока имаат правоаголна форма и се изработени од челик, својства што воопшто не се поволни за живеење. Поради тоа, значаен дел од пренамената на нивната функција е изолацијата и отворите за прозорци и врати. Изолацијата се приглавува помеѓу конструкција од дрвени греди коишто даваат дополнителна јачина на ѕидовите од контејнерот, а по нејзино поставување, просторот дополнително се намалува и зафаќа 13.9 m². Внимавав отворите за врати и прозорци да имаат стандардни димензии и да се поставени во некаква симетрија, со цел да не предизвикуваат дополнително визуелно оптоварување на просторот.

Во третиот и последен дел, основата ја префрлам во 3ds Max каде што од 2D правам 3D – проект. Во овој дел, се задржувам на естетиката на просторот, односно материјалите, боите, дизајнот на мебелот, осветлувањето, итн. За полесно да го водам проектот, правам некаков вид на moodboard (најчесто на Pinterest). Конкретно за овој проект, бидејќи станува збор за мал и тесен простор, знаев дека ќе употребувам светли бои уште од почетокот, па имав некаква идеја во главата. 

Во просторот главно доминира светол фурнир на ѕидовите, подот и на корпусниот мебел. Во спротивност на ова, во кујната се појавува имитација на терацо-камен, кој инаку е скап и тежок. Како дел од корпусниот мебел имам вклопено и саксии за растенија, со цел да се добие порелаксирана атмосфера во просторот.“

Кога би требало да избере омилен дел од процесот на дизајнирање, ни кажа дека тоа би било организирањето на мебелот во просторот, испробување со различни димензии и форми, затоа што секој проект има нешто различно и специфично.

Процесот продолжува!
Секој месец разгледуваме по еден проект на студентите од Академијата за продукт дизајн.

До следното читање,
Марија Цвеевска.

The post ПРОШЕТКА НИЗ ДИЗАЈН-ПРОЦЕСОТ: АЛТЕРНАТИВНО СТУДЕНТСКО ДОМУВАЊЕ; ПРЕНАМЕНА НА КОНТЕЈНЕРИ ЗА ТРАНСПОРТ appeared first on Skala School.

МОДЕН ДНЕВНИК #1

на Ева Поп Таневска

Опсервирај, учи, создавај, покажи.
Сакаш да запознаваш и осознаваш, да истражуваш и фантазираш? Да го откриеш непознатото и достигнеш невозможното… Со само една замисла и идеја, ти бестрашно се впушташ во креирање на секојдневието. Секојдневие каде што МОДАТА го движи, менува и обликува светот на постоечкото, но и новото и непознатото!

Јас, Ева Поп Таневска, ја имам таа привилегија да ги следам процесите на моите колеги/колешки од Академијата за моден дизајн, во Школата за дизајн и уметност Џолев и уметностите. Целта на овој моден дневник е да ги архивирам и документирам нивните процеси и проекти. Ќе започнам со Христина Младенова, која ни го открива развојот на еден нејзин студентски проект во процес. Таа ми раскажа за миксот помеѓу традицијата и екстравагантноста.

Од самиот момент кога менторот Никола Ефтимов ни ја додели задачата [да одберeме модна куќа како инспирација за новата мини колекција], Христина знаеше дека нејзиното решение лежи во спојот помеѓу екстравагантноста на и уметничките дела на Kamisaka Sekka, кои особено и се драги поради нејзината уметничка позадина.
Овие две големи уметнички имиња, раскажуваат цела приказна за соединувањето на она што веќе го знаеш, го гледаш и го чувствуваш. Животната приказна и креациите на Alexander McQueen имаат големо влијание на нејзиното творештво, а истовремено го обожава и стилот на традиционални јапонски уметнички дела.
Спојот на модата во времето на Kamisaka Sekka и елегантноста, уникатноста и екстравагантноста на Alexander McQueen создава нешто ново и препознатливо. Животните искуства и приказни, пасијата, љубовта кон модата и уметноста ја натерале покрај целото црнило да ја пронајде својата светлина и шаренило.

Христина вели:

„Пораката и мислата зад оваа колекција е дека покрај се што ќе доживееме може да си ја пронајдеме ведрата и среќна страна. Пред се сакам луѓето да се чувствуваат самоуверено и удобно во своја кожа и да се прифатат онакви какви што се.”

The post МОДЕН ДНЕВНИК / ХРИСТИНА МЛАДЕНОВА appeared first on Skala School.

Овој месец школата прослави 8 години од првиот одржан час. На денот на роденденот (3 мај) неофицијално ја претставивме првата студентска платформа за дизајн и уметност – Скала Магазин, која активно со свои содржини ќе започне на 1 јуни. Токму оваа рубрика од идниот месец се сели на Скала! 

Сите овие поводи, нè инспирираа да „пробуричкаме“ по нашите алумни од Академијата за визуелни уметности и нивните последни активности што оставија впечаток пред сè на социјалните медиуми во месец април, од веќе познатата причина која нè одвои од нормалните општествени текови. 

Иван Мегленов

Ќе започнеме со Иван Мегленов, студент од генерацијата 2017/18, кој веднаш по завршување на aкадемијата започна со пракса во „Сеавус едукативен и развоен центар“, каде што денес е вработен во маркетинг-секторот како графички дизајнер. 

Ако можеме делото да го сместиме во ликовна дисциплина, тоа би било мртва природа. Или пак, во најчестиот пејзаж со којшто се сретнуваме изминатите недели. Воодушевува оригиналноста во ликовниот и идејниот пристап од причина што се изнагледавме 2-Д (деликвентистички) илустративни решенија. Иван, покрај идејната концепција, ни покажува занаетска вештина на вистински ликовен уметник, преку макотрпна и трпелива работа на сенчење точка по точка со што постигнал волумен (и тактилност) на препознатливите елементи oд круцијално значање на нашето суштествување, додека лоровите венци ја возвишуваат атмосферата, како парабола на реалноста, со цел да ја дополни катарзата на оваа пред сè, саркасична композиција. 

Автор: Иван Мегленов
Наслов на дело:  Фокусирај се на доброто
Медиум: Дигитална графика
Академија: Визуелни уметности (2017/18)

ИВАН: Во овие неколку месеци, целиот наш фокус е на глобалната состојба со пандемијата и економската криза како последица. Сите сме засегнати и размислуваме за тоа како ова влијае на нас и што ќе следува. Заобиколени сме од негативни вести и информации, од телевизија до социјални медиуми. На сите ни создава голема анксиозност, но кога толку многу работи се надвор од наша контрола единствено што ни останува е да ги почитуваме препораките од СЗО и да се фокусираме на својот живот и да го правиме она што нè прави среќни. Би било одлично доколку би можеле овој период во карантин да го искористиме за да се фокусираме на себеси, да се зближиме со своите блиски, да ги поправиме односите со нашите родители и деца, да научиме некоја нова вештина, да станеме подобра верзија од себе. 

Софија Цветковиќ

Продолжуваме со убави вести! Софија (Софи) е студентка на Академијата за визуелни уметности од генерација 2018/19. Денес, работи како графички дизајнер во маркетинг-агенцијата „Публицис“, а надвор од професионалните активности времето го поминува фотографирајќи сè и сешто. 

Софи изминатиот месец се сети на каталонскиот празник St Jordi, кој се празнува на 23 април и реши да го прослави со дигитален квадриптих. Тоа е денот на книгата и розата во Каталонија. Прекрасно! 

По дефиниција ова би можело да се карактеризира како минималистичко графичко решение во однос на употреба на ликовни елементи и принципи (боја, форма, линија, текстура…), што претставува препознатлив визуелен наратив за Софија. Во нејзините дела се забележува постојана тенденција на расчленување на формата, често (како и во овој случај) со помош на ритмичко повторување постигнува патерни и дезени што можат да функционираат сами за себе, но истовремено и да се применат/аплицираат во поширок комерцијален контекст.

Автор: Софија Цветковиќ
Наслов на квадриптих: St Jordi
Медиум: Дигитална графика
Академија: Визуелни уметности (2018/19)

СОФИЈА: St Jordi е еден од најубавите каталонски празници, каде што се празнува светецот Џорди, кој според каталонската легенда бил јунакот кој ја спасил принцезата од змејот. Таа му дарува книга, а тој нејзе – роза. Не ме допре толку приказната, колку што ме допре тоа како Каталонците го слават овој ден: градовите се полни со рози, од прозорци, клупи, кровови, излози, улиците се полни со книги и луѓето тој ден го поминуваат подарувајќи си книги и рози :’) Иако е клише-приказна (принцеза и змеј), има нешто посебно во тоа што еден народ масовно одбира да празнува такво нешто на таков начин. <3 🌹

Лазар Зафировски

Лазар е студент од генерацијата 2017/18. По завршување на Академијата се вработи како фотограф во модната куќа „Елена Лука“, додека денес на сопствен ќеф работи како фриленс- портрет и моден фотограф. 

Делото е реализирано во соработка со модниот бренд LUDUS и е дел од фотоедиторијалот за новата колекција „Post-gender Chapter II”. 
Модниот фотоедиторијал одликува со успешна метаморфоза помеѓу експресијата на телата и просторот. И двата елементи студени, недефинирани, бесполови, неземски, утописки. Фото-есеј што успешно се надоврзува и до инспирацијата на самиот автор, со цел полесно наметнување кон целната група – купувачи, преку јасно дефинирана естетика со цел потенцијалниот купувач да се препознае или одбие од производот што е исклучително важно за секој моден бренд.

Автор: Лазар Зафировски
Медиум: Модна Фотографија
Академија: Визуелни уметности (2017/18)
За: LUDUS (моден бренд)
Модели: Ивана / Стефан / Филип
Шминка и фризура: Мартина Ивановска

ЛАЗАР: Освен со модна фотографија, практикувам и портрет и акт-фотографија. Едноставно сакам да фотографирам луѓе, лица, тела… Целта ми е да изразам емоција и чувства преку фотографиите, таква беше и мојата прва изложба „Mágoa“ (2018) отворена во галерија „Акантус“. 

ДАЛИ ГИ ПОГЛЕДНА: НАЈОЗБОРУВАНИТЕ ЗА МЕСЕЦ MAРТ?!

The post Топ 3 за месец април appeared first on Skala School.

Каде е убавото, во објектот или во умот на набљудувачот? За овие прашања се расправа уште од антиката. Размислувања за убавото, возвишеното, вкусот или „естетика“ наука за сетилното спознание како што ја дефинирал германскиот филозоф Баумгартен.

Една од најголемите, ако не и најголемата заблуда која постои во размислувањата за и околу дизајнот и уметноста е дека за вкусовите не се расправа. Вистината е дека вкусовите не треба да се наметнуваат, всушност, доколку не говориме за вкусовите, што ни преостанува?! Со што ќе се занимаваме сите ние, кои сме ги одбрале дизајнот и уметноста како повик, ако не со постојано проблематизирање, надоврзување, критика и превреднување на вкусовите?! Што ќе се случеше со уметностите доколку, скриени зад лажната максима „за вкусовите не се расправа“, постојано бевме упатени да се восхитуваме на еден уметнички стил, еден правец, еден дискурс во расправите за уметноста?! 

Да се направи селекција на најдобрите три дела од изминатиот месец на Академијата за визуелни уметности, програма на која студираат 22 студенти, е навистина тешка позиција. Токму затоа оваа рубрика ги претставува најозборуваните, оние дела кои оставиле впечаток при анализа на часовите, социјалните медиуми или други „корзо“ концепти. Всушност расправата оттаму, ја продолжуваме во оваа форма, сè со цел наметнување на поширок дискурс во споменатиот контекст. 

Илијана Такашманова

Одбројувањето го започнуваме со илустративен триптих на Илијана, дело кое одекна по социјалните медиуми преку интервјуто на Радио Моф. Делото може да го карактеризираме пред сè како супкултурна опсервација. Дали ова дело е носталгичен копнеж, алегорија на осумдесеттите и деведесеттите години  од минатиот век или пак раскажување на вчерашниот ден?! Василиј Кандински, големиот сликар и ликовен теоретичар во неговот дело „За духовното во уметноста“ меѓу другото вели: „Бојата е ликовен елемент која кај набљудувачот предизвикува директна емоционална реакција“. Следејќи го овој психолошки феномен, можеме да кажеме дека се работи за визуелна пенетрација во минатото, преку изборот на колоритната палета, пред сè поради изборот на сепија подлога, која веднаш алудира во нашата потсвест дека тука поминало многу време и дека ова не е кадар од вчерашниот ден во скејт-паркот. Бојата е јазик, а да се зборува е привилегија, тоа се првите лекции на нашата академија.

Автор: Илијана Такашманова
Наслов на триптих: Just a flick through my concave
Композиција I: Airskate
Композиција II: Skate
Композиција III: Shoe
Медиум: Дигитална графика
Академија: Визуелни уметности

ИЛИЈАНА: Илустрациите имаат огромно влијание од секојдневието, но препознатливи сегменти во моите дела доаѓаат и од јапонска култура. Како и самиот псевдоним кој го користам wabisabi__________  ја означува традиционалната јапонска естетика за прифаќање на минливото и неизвесното, можам да кажам дека цел тој идентитет држи до огромно спиритуално значање. 

Елена Стојковска

Сведоци сме на стварност што ќе ја прераскажуваме на нашите внуци, но стварност што ќе ја прераскажуваме и во нашите дела, всушност тоа веќе и се случува. Дизајн-сцената е инспирирана од општествената вистина и предизвикана да придонесе кон свесноста на јавното здравје. Делото на Елена беше претставено на неколку дигитални медиуми, но беше издвоено и објавено од страна и на Министерството за здравство, селектирано од десетиците креативни решенија што ги видовме изминатиот период, рамо до рамо со менторот Зоран Кардула. Честитки Елена! Слоганот е од исклучителна важност во дизајнот, „At this point in TIME, we need some SPACE“ е наративот кој успешно ја поддржува илустративната приказна. Честитки втор пат el.hue 🙂 

Автор: Елена Стојковска
Наслов на дело: At this point in TIME, we need some SPACE
Медиум: Дигитална графика
Академија: Визуелни уметности

ЕЛЕНА: Поттикната од глобалната ситуација и препораките за социјално дистанцирање, создадов едноставна визуелна порака за простор-времето, преку тивки форми и тонови во контекст вселена, сметам дека пораката буди чувство на удобност кое неминовно ни е потребно во ова време. …време-невреме во еден простор што може да се шири колку што се стеснува, простор на значајна комуникација со себе и други, релативно е нели?

Владо Србиновски

Владо е визуелен артист со впечатлива и препознатлива линија. Тенденција што ја негува, наполнува, развива уште пред да го запознаеме на Академијата за визуелни уметности, постојана потрага по сопствен јазик кој ќе биде разбирлив и допадлив за вкусовите и на најприбирливите дизајн-гурмани. Во неговите дела може да се забележи влијанието на мајсторите од Баухаус школата, Де стилот, Конструктивизмот, Суперматизмот, Кубизмот и сите побратимски стилови во ликовната уметност и дизајнот од почетокот на минатиот век. Впечатлива е оригиналноста во темата на овој илустративен триптих. Всушност, се работи за колекција во процес, секоја графика е сцена од античката митологија. Во полиеистичката религија на старите Грци можеме да забележиме наративно и визуелно претставување на боговите преку човечки облик, со сите човечки особини и маани, додека Владо се обидува да наметне сопствена логика преку геометриски реализам кој е автохтон на физичките закони од овој свет, но апсолутно стилизиран во смисла на предметноста. 

Автор: Владо Србиновски __premigato
Наслов на композиција I: Narcissus
Наслов на композиција II: Sisyphus
Наслов на композиција III: Icarus
Медиум: Дигитална графика
Академија: Визуелни уметности

ВЛАДО: Античката митологија ја примаме здраво за готово, како приказни со почеток и крај, најчесто за антихерои и нивната трагична судбина што сметам дека не е целата вистина. Преку митовите ја барам вистината за себе, за останатите. Односно, дали доволно се познаваме себеси, за да го воспоставиме балансот во миговите кога се соочуваме со падови?!

ДАЛИ ГИ ПОГЛЕДНА: НАЈОЗБОРУВАНИТЕ ЗА МЕСЕЦ ФЕВРУАРИ?!

The post Топ 3 за месец март appeared first on Skala School.

Изборот на 3 најозборувани дела за месецот е навистина предизвик! Не затоа што премногу озборуваме, туку затоа што студентите се исклучително креативни и продуктивни. Можеби во иднина оваа рубрика ќе ја поделиме во повеќе категории за да ви ја доближиме активноста на студентите, но секако ова е само мал сегмент од она што нè очекува во септември, кога студентите традиционално во 5 хали ќе ги изложат своите најдобрите дела. Изминатите години, оваа дизајнерска изложба е најмасовната во градот од аспект на дела и посетеност. 

Драг месец јануари, ти благодариме!

Диме Данов 

Овој јануари, покрај тоа што ги озборуваме делата на студентите, случајно на тапет ни се и големите современи и историски артисти. Диме Данов работеше на репродукција на култно сликарско дело од големиот австриски сликар Егон Шиле. „Девојка со жолта марама“ е типично дело за авторот изработено во акварелна техника (и молив), женско голо тело во контрагирана седечка позиција, која истовремено сугерира извесно движење. Диме како автор на репродукција (рекреација) на ова дело беше свесен за многу повеќе технички и симболички аспекти на делото, за да може да премине кон предпродукција, продукција и постпродукција на сликата кон фотографија. 

Автор: Диме Данов
Проект: Репродукција [или реконтекстуализација] на култно сликарско дело
Автор на оригинално дело: Egon Schiele
Наслов на оригинално дело: Girl with yellow scarf
Медиум: Фотографија со дигитална манипулација
Предмет: Фотографија и постпродукција на фотографија
Ментор: Дејан Џолев

Во процесот на работа се обидував да го емулирам сликарскиот процес колку што можам, без притоа да ги изгубам фотографските одлики. Решението беше да се слика врз субјектот, па потоа тој слој боја да се вклопи со одреден layer mode. Најголемиот предизвик беше позирањето на моделот, тој ѝ дава предност на експресијата пред реалистичното отсликување и беше навистина тешко да ја најдеме точната позиција, но при позирање со моделот разбравме и што ни кажува Шиле за оваа девојка, за нејзината видлива болка, па се обидовме да го следиме тоа чувство. После оваа задача сум подготвен и за уште поголеми визуелни предизвици. 

Магдалена Филипова 

Магдалена Филипова vs Тим Бартон. Почетоците на овој голем филмски автор се токму во сферата на визуелните уметности. Тим во раните осумдесети работи како графички дизајнер, сториборд- артист, концептуален уметник, додека подоцна почнува да се плетка со анимација, каде што ја добива првата идеја за снимање на филм. Неговите филмови денес се пример за комплетно авторство на еден визуелен уметник. Тим е сценограф, карактер и продукт дизајнер, генерално сè што е визуелно и наративно во неговите дела. Затоа и целта на оваа академија е студентите да се подготват како мултидисциплинарни артисти и дизајнери, за потребите на нивните комерцијални проекти или авторски дела. Затоа што вештината е многу повеќе од алатки.

Автор: Магдалена Филипова
Наслов: Sometimes, the only way to catch an uncatchable woman is to offer her a wedding ring [цитат од филмот]
Медиум: Дизајн на филмски постер
Предмет: Дигитална илустрација [ADOBE Illustrator]
Ментор: Зоран Кардула

„Big Fish“ (Голема риба) не е мојот апсолутно омилен филм, но е во првите 5 омилени. Прекрасно дело на режисерот со огромна имагинација. Филмот е шарен и полн со детали, затоа се одлучив да експериментирам и да го илустрирам буквално насловот. Во врска со мојот стил би го цитирала мојот колега Бојан Матеjин – „Стилот сè уште ми варира на ниво на зададената задача“.

Никола Панов

Никола Панов е исклучително талентиран студент, со широк спектар на изразни визуелни вештини. Но, нешто што го одликува и што е за посебна пофалба е неговата конзистентност. Оваа фотографија преку реконтекстуализација на сликарското дело од белгискиот надреалист Рене Магрит, претставува автопортрет на Никола. 

Автор: Никола Панов
Проект: Репродукција [или реконтекстуализација] на култно сликарско дело
Автор на оригинално дело: Rene Magritte
Наслов на оригинално дело: Man in a Bowler Hat
Медиум: Фотографија со дигитална манипулација
Предмет: Фотографија и постпродукција на фотографија
Ментор: Дејан Џолев

Целиот процес на создавање беше одлично и забавно искуство. Од подготовка на потребни реквизити, скицирање, светлосни подготовки, фотографирање, па сè до постпродукција и монтажа на фотографија, колор корекција… Со инспиративна помош од мојот ментор Дејан Џолев целта на идејата беше исполнета. Задоволен сум од крајниот резултат и одвај чекам да продолжам со следниот предизвик!

ДАЛИ ГИ ПОГЛЕДНА: НАЈОЗБОРУВАНИТЕ ЗА МЕСЕЦ ДЕКЕМВРИ!?

КАЖИ ИМ НА ДРУГАРИТЕ И ДРУГАРКИТЕ!
УПИСИТЕ СЕ ВО ТЕК: АКАДЕМИЈА ЗА ГРАФИЧКИ ДИЗАЈН.

АПЛИЦИРАЈ ЗА ЦЕЛОСНА СТИПЕНДИЈА!

The post Топ 3 за месец јануари appeared first on Skala School.